Qurban Qurbanovdan istefa şərhi

Azərbaycan millisinin baş məşqçi vəzifəsindən ayrılan Qurban Qurbanov brifinq keçirib. Metbuat.az-ın məlumatına görə, təcrübəli mütəxəssis jurnalistlərin suallarını cavablandırıb.

- Açığı, iclasda 10-15 dəqiqə iştirak etdim. Çünki mənim məsələm çox müzakirə olunurdu. Ona görə kənarda durmalı idim, məsələm həll olunurdu. Necə ki təyin olunanda xeyli qıraqda qalmışdım. Bu gün milli ilə yollarımızı ayırdıq. Dedilər ki, həm millidə olmaq, həm də klubda qalmağımla bəlkə səhv addım atdım. Düşünmək olardı ki, fayda verərdi. Ancaq görünən odur ki, bir o qədər də faydası olmadı. Beləcə yollarımızı ayırdıq. İK üzvlərinin hər birinə təşəkkür etdim ki, bu 1 ildə millidə oldum, vicdanla işimizi yerinə yetirməyə çalışdıq. Futbolda nəticələr alına da bilər, alınmaya da Əlbəttə, uzun müddətli proqram əsasında çalışmaq danışığımız olmuşdu. Ancaq hər bir halda, işimiz elədir ki, nə qədər uzun müddətə müqavilə bağlasaq da, çemodanımız yanımızda olmalıdır. Çünki fikirlər dəyişə, üst-üstə düşməyə bilər. İK üzvlərinin hər birinə uğurlar arzuladım.

- Bəs aşağı yaş qruplarındakı baş məşqçilər necə olacaq?

- Hələ dünəndən məlumat verilmişdi ki, hamı istefaya göndəriləcək. Həmin müzakirə hissəsində mən olmadım. Sonra iclasa daxil oldum, onda Hakimlər Komitəsinin tərkibi müzakirə olunurdu. Məşqim olduğu üçün 10-15 dəqiqə oturdum və çıxdım.

- Nəzərdə tutulan proqramla qalsaydı, millini yeni mərhələyə daşıya bilərdinizmi?

- İndi durub hər hansı fikir bildirməyim düzgün olmazdı ki, qalsaydım, belə olardı. Artıq yollarımızı ayırmışıq. Ümumiyyətlə, kollektiv oyunda təməli möhkəm etməlisən ki, sonra nəticə olsun.

- "Sıfırdan başlamalıyıq" fikrinizi ifadə edəndən sonra sizə qarşı münasibət dəyişdi...

- Yox, inanmıram. Bu gün da deyirəm ki, həqiqətən sıfırdan başlamalıyıq. Ümumiyyətlə, bu gün futbolumuzun çatışmayan cəhətləri çoxdur. Hələ ki fakt budur.

- Hər halda, 6 illik müqavilənin qarşılığında müəyyən plan irəli sürmüşdünüz. Niyə buna imkan vermədilər?

- Onlara 6 illik plan verməmişdik. Bu, elə bir şeydir ki, mərhələ-mərhələ bunu etməliyik. Sonda belə oldu.

- Düşünmürsünüz ki, üzərinizdən böyük bir yük qalxdı?

- Bilmirəm, ola bilər. Mənə sual verilmişdi ki, iki yerdə işləyəndə necə etmək olar. Mən "Qarabağ"la millini bir-birindən ayırmamışdım. Hər biri böyük məsuliyyət tələb edir və hər birində çox vicdanla çalışmalıyıq. Bunu elədim, rahatam. Bu işlərdə daha diqqətli olmalıyıq.

- Azərbaycan məşqçiləri arasında uğurlarınıza görə ən elitada siz idiniz. Onda belə çıxır ki, yaxın bir neçə ildə millinin "sükanı arxası"nda yerli mütəxəssis gözləməyək?

- Bilmirəm ki, bu suala mənə vermək olar, ya yox.

- Artıq millidən getmisiniz və kənardan baxırsınız...

- Cavan məşqçilərimiz gəlir və hələ ki federasiyanın üzərinə buraxmaq lazımdır. Dəfərlərlə demişəm ki, cavabdeh AFFA-dır və daha düzgününü axtarıb tapacaqlar.

- Düşünmürsünüz ki, sizə qarşı haqsızlıq oldu?

- Ümumiyyətlə heç vaxt belə fikirdə olmamışam. Dəfələrlə belə təcrübənin şahidi olmuşuq.

- İclasa gələndə, artıq bilirdinizmi ki, milliylə vidalaşaqsınız?

- Bilməsəm də, belə deyək bilən kimi idim.

- Qurban Qurbanov millidən göndərdildi, yoxsa özü getdi?

- Qarşılıqlı oldu. İK üzvləri belə qərara gəldilər ki, iki yerdə işləməklə bağlı səhv addım atıblar. Gördük ki, çətindir və belə qərara gəldilər.

- Yəqin, düşünmüsüz ki, nəyi düz, nəyi səhv etdiniz. Qalsaydınız, nəyi aradan qaldırmaq istərdiniz ki, məhz bu səhvə görə işiniz düz getmədi?

- Gəlin, qalsaydıq deyə düşünməyək. Ancaq oldum müddətdə çalışdım ki, hər şeyi düz etməyə. Əlbəttə, düşüncələrim belədir ki, nəticə olsun. Bəlkə bilmədən, düşünmədən hər hansı səhvə yol verə bilərik. Ancaq inanın ki, hər bir şeyi düz etməyə çalışdım.


Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)
Загрузка...

RƏYLƏR

BU KATEQORİYADAN DİGƏR XƏBƏRLƏR